कैलाली ओ कञ्चनपुरके राना थारु समुदायके महिलाहूके्र आज परम्परागत रूपमे तीज पर्व मनैतै ।् राना थारु समुदायके महिलाहूके्र श्रावण शुक्लपक्षके तृतीया तिथिमे मनैना तीज पर्व यहे वर्ष साउन ३० गते परल बात ।
राना थारु समुदायमे तीजहे महत्वपूर्ण सांस्कृतिक ओ धार्मिक पर्वके रूपमे लेथै । यी पर्वहे दिदीबहिनी ओ दाजुभाइ–भतिजाबीचके आत्मीयता, भ्रातृत्व ओ पारिवारिक सम्बन्धहे थप मजबुत बनैना विश्वास कर्थ  ।
किम्बदन्तीअनुसार परम्परागत समयमे राना थारु समुदायमे बिरामी फैल्लेसे घरके कमैना मनै मृत्यु हुइना ओ वकर कारण से परिवारमे गरिबी बढ्ना करल रहे । तबसे दिदीबहिनीहूक्रे भगवान् श्रीकृष्णके पूजाअर्चना कर्लेसे समाजसे दुःख, पीडा ओ गरिबी हट्ना विश्वासमे सोही दिनसे तीज पर्व मनै लग्ना मान्यता रहल बाट । 
सांस्कृतिक, सामाजिक ओ भ्रातृत्व प्रेमहे ओतप्रोत यहे पर्वमे दिदीबहिनीहूके्र दाजुभाइ ओ भतिजाके दीर्घायु ओ सुख–समृद्धिके कामना कर्ती पानीसमेत नैखाके व्रत बैठना चलन बाट ।
राना थारु समुदायमे तीजके छुट्टै सामाजिक परम्परा फेन रहल बाट ।  तीज अइनासे करिब १५ दिनआघे ही दाजुभाइहूके्र दिदीबहिनीके घरमे पुग्के नियूता देना ओ हूकनहे माइतीमे जाके लन्ना चलन बाट । वस्तेके, तीजके आगमनसँगे दाजुभाइहूके्र दिदीबहिनीके लाग सार्वजनिक स्थान, बगैँचा  सामूहिक रूपमे भेला हुइना स्थानमे डोला (पिङ) धर्ना परम्परा फेन बाट । 
राना थारु समुदायके महिलाहूके्र मनैना तीज पर्वके अवसरमे धनगढी उपमहानगरपालिका स्थानीय सार्वजनिक बिदा देहेल बाटै ।
धनगढी उपमहानगरपालिके नगर कार्यपालिकाके निर्णयअनुसार साउन ३० गते एक दिन धनगढी उपमहानगरपालिके क्षेत्रभित्रर स्थानीय सार्वजनिक बिदा देहेल बाट ।  
उपमहानगरपालिकाहे जारी करल सूचनाअनुसार साउन ३० गते धनगढी क्षेत्रभित्ररके सम्पूर्ण सरकारी कार्यालय, शिक्षण संस्था ओ संघ–संस्थामे स्थानीय सार्वजनिक बिदा लागू हुइना बाट ।
राना थारु समुदायके मौलिक संस्कृति, परम्परा ओ धार्मिक आस्थासँगे जोरल तीज पर्वके संरक्षण, प्रवद्र्धन ओ सम्मानके लाग सार्वजनिक बिदा देना निर्णय करल उपमहानगरपालिकाहूक्रे जनाइल बाट ।